Aurten euskal dantza taldeek inoiz baino ilusio eta beldur handiagoz ekingo diogu denboraldi berriari. Bizi izan dugun egoerak ondorioak izan ditu, baina aurrera egingo dugu.
Taldeak egiten ari diren ahaleginaren adibide bat Ostadar Dantza Taldearena da. Laguntza eskatzen digute beren lana zabaltzen lagun diezaiegun. Zorionak aurrera egiten saiatzen ari diren talde guztiei.
———-
Ostadar Dantza Taldearen oharra
2021-2022. ikasturtea hastearekin batera, Ostadar Dantza Taldeak aurreko ikasturteetan harrera ona izan duten plaza dantzen ikastaroei jarraipena egitea erabaki du, aurtengoan ere deialdi berri bat eginez.
Ikastaroaren helburu nagusia “plaza dantza” edota erromerietako dantza gisa ezagutzen diren koreografiak irakastea da, hauei buruzko azalpenak ematearekin batera. Ikastaroan izena eman nahi duenak bi ordutegi hauetakoren bat aukeratu beharko du:
- Asteartetan, 18:00etatik 19:00etara
- Asteazkenetan, 18:00etatik 19:00etara
Bizi dugun egoera kontuan izanda, ikastaroaren plangintza ere horren arabera moldatuko da, uneoro segurtasun eta higiene neurriak zainduz.
Gure partetik, Beasaingo zein inguruko herritarrak ikastaroan izena ematera eta astean behin dantza eginez une atsegin bat pasatzera animatzen ditugu.
Ostadar Dantza Taldea
———-
